॥दोहा॥
आठ पहर यू ही गया, माया मोह जंजाल।
राम नाम हृदय नहीं, जीत लिया जम काल॥

कलजुग झाला देतो आवे रे, चौडे धाडे।
चौडे धाडे ओ, कलजुग हेला मारे।
कलयुग झाला देतो आवे रे, चौडे धाडे॥

॥टेर॥
सतयुग त्रेतायुग द्वापर कि, उठ रित पुराई।
कान खोल सुनले भाया, कलजुग री चतुराई।
के सारा एकन लारे हो गया रे, चौडे धाडे।
चौडे धाडे ओ, कलजुग हेला मारे।
कलयुग झाला देतो आवे रे, चौडे धाडे॥

बात सुने मुंडे नी बोले, माँ का जाया भाई।
सारा झूठा करे मुकदमा, अदालत रे माई।
के जिनसु मोटी रिश्वत देवे रे, चौडे धाडे।
चौडे धाडे ओ, कलजुग हेला मारे।
कलयुग झाला देतो आवे रे, चौडे धाडे॥

दुःख देख ने जाकर करी, थाने माई पुकार।
उल्टा दोष बतावे मुंशी, पुलिस थानेदार।
ज्याने रोकडीया गिनवावे रे, चौडे धाडे।
चौडे धाडे ओ, कलजुग हेला मारे।
कलयुग झाला देतो आवे रे, चौडे धाडे॥

बेटा ने परणायो बिन्दनी, अली गली मे डोले।
काम काज रो केवे तो, सासु सु करडी बोले।
के बेटा बाप ने धमकावे रे, चौडे धाडे।
चौडे धाडे ओ, कलजुग हेला मारे।
कलयुग झाला देतो आवे रे, चौडे धाडे॥

देखो रे कलजुग री छाया, मर्दा मूंछ मंडाय।
बालम जिनरा भोला भाला, बी ए पास लुगाई।
के सिर पर दो दो चोटी राखे रे, चौडे धाडे।
चौडे धाडे ओ, कलजुग हेला मारे।
कलयुग झाला देतो आवे रे, चौडे धाडे॥

इन कलजुग री रचना देखने, एडी बात बनाई।
कलम उठाने लिख दियो, भाई बूरो मानजो नाही।
ए मगनो भजन बनायो गावे रे, चौडे धाडे।
चौडे धाडे ओ, कलजुग हेला मारे॥

कलजुग झाला देतो आवे रे, चौडे धाडे।
चौडे धाडे ओ, कलजुग हेला मारे।
कलयुग झाला देतो आवे रे, चौडे धाडे॥

Share on Facebook

Tweet

Follow us

Save